Responder a este mensaje

GUARDACOSTA A SALBA TRIPULACION NET ORA CU LANCHA A SINK

ORANJESTAD (AAN): Tabata Diahuebs mainta, cu yamada di auxilio a drenta di un lancha, cu tabata yenando cu awa e momento ey, na un distancia di 100 kilometer pariba di Aruba.

   Guardacosta di Aruba y Antiyas, cu e centro di rescate y coordinacion (RCC) tambe a haya e yamada ey, y ta mustra cu e lancha mas bien ta 7 miya zuid di Annabaai na Curacao.

   Tabata 8’or di e may-day a drenta, y e ta procedente di e lancha “Carmen Reinelly” di Venezuela, cu tabata cuminza sink e momento ey.

   Mesora e cutter Panter di Guardacosta a cuminza mobiliza pa e area, pa brinda asistencia.  E organizacion di rescate di voluntario, CITRO, tambe a worde notifica.

   Panter a logra yega rapido na e lugar, y mesora a mara un cabuya na e lancha.  Un poco despues e botonan di CITRO tambe a yega, y cu yudanza di pomp a cuminza saca awa di e lancha, pero esaki no tabata exitoso.

   Na dado momento, e lancha a kentel, y esaki a pone cu el a cuminza sink masha rapido mes.  No tabatin ni chens pa saca e dos pomp caro tipo “lenspump” di CITRO, y e lancha a djis sink y bay cu nan abao pa fondo di laman.

   E boto di CITRO, y Panter a tuma e diez naufrago abordo, y a regresa bek pa Curacao, y pa 11’or nan a baha nan na waf na Otrabanda.  Un di e nabegantenan tabatin problema su rosea, y el a ricibi asistencia medico.

---